بتسأل عنى انا مين ؟! .. انا تاجر
الفرحه و البهجه الحزين , انا كوميديا الموقف و ضحكه المكسورين , انا جرح لحظه و
علاج السنين !
انا اللى حب بجد و ضاع من عمره سنين
, انا اللى صاحب صاحبه و تقال له انت لو مفيش مصلحه متعرفنيش !
انا اللى بعدت عن احلام كان نفسها تعيش
, انا اللى راح مكان جديد و معرفش يعيش , انا اللى دايما موجود بس فى المرايا
متشوفنيش !
انا اللى كان يضحك يسمع البعيد , انا
الغلبان الطيب الوحيد , انا اللى اترسم عليه اجمل قصص و تأليف , انا اللى صدق و
سلم و قال امين !
انا اللى اتجرح و سكت و سامح و قال
اكيد مش حاسيين , انا اللى عرض حبه و مشاعره و متدرش عليه !
انا اللى حلمت بحاجات كتير و طلعت
كلها على مفيش , انا اللى عرف ناس و باعوا عشره سنين !
انا اللى مأخدش حقه و عاش ضعيف مسكين
, انا اللى ساعه المواجهه بكون انسان شرير , انا اللى حب و اتجرح و الدموع اشتكت
من جرحى الكبير !
انا اللى لسه بحب اللى اشتكى و بكى
بدموع العين , انا اللى عارف ان مهما عملت هفضل فى نظرهم واحد ضعيف !
انا اللى راح و قرب و فضل بعيد , انا
اللى حبيت بنت الجيران و لما بعدت معرفتش اعيش , انا اللى لعب فى الشارع و جرى ورا
عربيات الرش و عاش احلى سنين !
انا اللى شجع و حب لعب الكوره و ولع
شمروخ و قال داخليه مع**ين , انا اللى نزل مظاهرات و مسك طوب قدام مدرعات النظام
القديم !
انا اللى بقعد على قهاوى المثقفين ,
انا اللى بشرب قهوه و شاى و اشد حجرين , انا اللى بلعب طوله و اجيب بالبفتين !
انا اللى بعشق الغنا و احلام
الغلبانين , انا اللى دموعه بتنزل لما يحس بقله الحيله و مفيش حاجه فى اليدين !
انا اللى عندى انفصام فى الشخصيه و
بعامل الناس على ان اتنين , انا اللى تفكيرى تعبنى و دوخ ناس تانين !
انا اللى بعشق الوحده و البعد عن
المجانين , انا اللى بكلم نفسى و ساعات برد فى الحالتين , انا اللى بكتب و امسح
احفظ و انسى كلام الملايين !
انا اللى بسيب اللى يطير يطير عشان
تعبت من كتر التفكير , انا اللى بحلم ببكره اللى مبيجيش !
انا اللى بنفض لاى بنت فاكره ان مجرد
سلامى عليها اعجاب و تسبيل , انا اللى عايش درويش فى بلاد الله و على الصحه
متسألنيش !
انا اللى اتهان و اتشتم , انا اللى
اتجبس و اتكسر , انا اللى ياما فى حطان لبس , انا اللى غضب و اضرب اتقتل و اتسحل
انا اللى دمى سال و حقى راح بسبب ناس مصلحنجيه مع**ين !
انا اللى قلت ثوره و تغير , انا اللى
شلت نظام قوى مستبد و لئيم , انا اللى قلت جعان يا حكومه عايز العيش !
انا اللى ساب السياسه و عشق المسرح و
التمثيل , انا اللى عمل بروفات و حفظ و الجمهور مسأفليش !
انا اللى عايز يشتغل و يقبض و يصرف و
يحوش و يعيش , انا اللى عايز اتجوز و اخلف و افتح بيت و اعيش حياه ناس طبيعين !
انا اللى فكر ينتحر و يسيب الدنيا و
اهلا بالموت اعز صديق , انا اللى شاف الطريق و مشى و فى الاخر لبس الخزوق المتين !
انا اللى لسه عايش ببركه دعاء
الوالدين !
ليست هناك تعليقات:
إرسال تعليق