السبت، 24 أكتوبر 2015

( 12 ) الهروب الكبير ! - شتاء 2005 - جزء 1




شتاء 2005 ...
ليله رأس السنه ... العنايه المركزه ...
_ حمدلله على السلامه .
    قالتها و هى تغرز حقنه داخل محلول معلق وجد طريقه داخل عروقى , غرقه حوائطها بيضاء و تلفاز صغير معلق , على اليمين نافذه و ستاره بلاستيكيه و لوحه معلقه بها منظر طبيعى و على اليسار الحمام و باب الغرفه و بالأمام كرسيان لزوار لن يأتوا , غارقا فى الجبس و الخياطات و صداع ترك العالم كله و مسك رأسى , سألتها ...
_ هو حصل ايه ؟! .
_ استريح دلوقتى .. قالتها بأبتسامه مريحه .
   و قبل ان ترحل , امسكت يدها البيضاء الناعمه , مكررا ...
_  معلش عايز اعرف ايه اللى حصل ؟!
    لم تجد طريقا للفرار من اسئلتى حتى قالت ...
_ انا عندى مرور دلوقتى هخلص و اجى احكى ليك .
   هززت رأسى موافقا و أنا لا أشعر بشئ سوى صداع قاتل , خاصيه أرجاع الشريط توقفت عندى , لا أتذكر أى شئ , لا زائرون ولا ورود ولا كروت تتمنى الشفاء العاجل , أشعر بأنى ولد هكذا , بعد أنتظار ساعات طويله وجدتها قادمه و تحمل فى يديها علبه عصير , سحبت كرسى و جلست بالقرب منى , وضعت الماسوره البلاسيكيه داخل علبه العصير و اعطتنى !
   بالكاد تذوقت طعمه و سألتها ...
   
_ هو ايه اللى حصل ؟!
   أعتدلت فى جلستها و قالت ...
_ حادثه عربيه , طلعوا العربيه من تحت تريله كانت واقفه على جنب الطريق و بعد كده طلعوك , الناس بتقول ان العربيه دخلت فى الترله بكل سرعتها , معجزه انك لسه عايش , قاطعتها و انا احاول اعاده المشهد ...
_ طيب انا حصلى ايه ؟!
   
   تنهدت ثم قالت ...
_ كسر فى الظهر اخر فقرتين , شرخ فى الحوض , خلع فى الركبه اليمين و الكوع الشمال و ارتجاج فى المخ , شرت بنظرى ناحيه النافذه قائلا لنفسى : هذه مجموعه حوادث و ليست حادثه واحده , انتهيت !
   أكملت ...
_ حالتك مستقره بس هتشرفنا هنا كتير , عاجلتها ...
_ محدش سأل عليه ؟!
_ انت بقالك هنا اكتر من شهرين فى غيبوبه , محدش سأل عليك خالص .
   أغمضت عينى و أنا ألعن نفسى عن سبب سؤالى لها عن حالتى و ماذا حدث , قامت من على الكرسى قائله ...
_ استريح دلوقتى .
   و قبل أن تفتح باب الغرفه و تخرج قالت ...
_ اه افتكرت , احنا ملقناش معاك لا بطاقه ولا موبيل ولا اى حاجه تثبت شخصيتك , انت مش فاكر اسمك ايه ؟!
   هززت رأسى نافيا , أى لا أعرف , ترددت قليلا قبل أن تكمل ...
_ انا اسفه , والدك و ولدتك ماتوا فى الحادثه .
   ثم خرجت مسرعه !

   من أنا ؟!
   من أبى و أمى ؟!
   ماذا حدث ؟!
   و أخيرا , لماذا لم يأتى أحد لزيارتى طوال هذه المده ؟!
   أسئله كثيره تدور داخل رأسى بدون توقف و الصداع يكاد يقتلنى , لا أستطيع تحمل المزيد من هذه الأسئله , مهما فعلت لن أحصل على أى أجابه و أنا أعانى فقدان فى الذاكره أو ربما أصبحت أعانى من فقدان حياه بأكملها , أحتاج إلى النوم و لو لساعات قليله !
   درجه الحراره ترتفع ببطئ ، أشعر بصهد يخرج من جسدي و العرق ينصب من علي جبيني و قطراته تسيل علي السرير ، غارق في النوم أو شبه نائم ، أحلم أم أعاني كابوس ، لا أعلم ، حواسي مستيقظه بعنف شديد تلتقت كل المثيرات ، سهم الهواء الخفيف علي وجهي و صوت صرير النافذه يمينا و يسارا تتراقص مع الريح و صوت موتور الماء يرفع للدور السابع , نائم مغروس بقلب السرير يكاد ظهري يلامس الأرض !
   قابعه فوق صدري واضعه يديها علي وجهي تزيح قطرات العرق ، صوت دقات قلبي بدأ يرتفع ، لا أراها ، عيني ثقيله حتي الموت ، رائحه عطرها حيه تلتف حول عنقي ، بؤبؤ العين يدور كمن وقع فريسه لأحد الاسود , أشعر بنهديها و أرجلها فوقي ، لا أستطيع أن أتنفس ، أريد أن أستيقظ ، يدي اليمني تتحرك ككفيف يشق طريقه داخل غرفه مظلمه ، لن تأخذ روحي ، لن أذهب معها ، لن أستسلم ، صوت المنبه يصرح في أرجاء الحجره !
   نظرت له و ضاقت عيناها و أشتعلت غضبا ، تتوعد أن تأتي مره أخري ، قمت ملدوغا كمن قرصه عقرب اتحسس رقبتي و صدري و أراقب هروبها من بين ثنايات النافذه , دخلت الممرضه و بيدها حقنه ثم تيبثت عندما رأتنى و بصعوبه قالت ...
_ انت مالك وشك اصفر كده ليه و غرقان فى العرق و ايه الاحمرار اللى حولين رقبتك ده ؟!
_ أ أ أ , انا بس تعبان و الحر و العرق هما اللى عملين كده فى رقبتى .
_ حر ايه و عرق ايه , ده احنا فى اول يناير , يعنى فى عز الشتا !
   لم أستطيع الرد عليها فليس لدى وصف أو تفسير لما حدث منذ قليل لكى أقوله لها أو لنفسى ...
_ عموما ده معاد الحقنه بتاعتك , هتريحك و تخليك تنام كويس .
   أخذ سائل الحقنه يشق طريقه داخل اوردتى حتى ذهبت فى النوم لا أشعر بشئ !

غرفه رقم 53 ...
   تم نقلى من العنايه المركزه بعد أن قضيت بها شهرين غائب عن الوعى إلى غرفه عاديه و مازلت غارقا فى الكسور و الخياطات و الجبس الأبيض الذى أصبح جزء منى , ظللت أحاول جاهدا أن أتذكر أى شئ عن الحادثه أو عن أهلى و أقاربى و الأصدقاء , و لكن كل المحاولات بائت بالفشل , أصبحت أشك إن الأمر ليس له علاقه بفقدان الذاكره فقط أنما أمتد إلى مناطق أخرى مرعبه , لان طوال وجودى بالمستشفى حتى هذه اللحظه لم يقم أحد بالسؤال عنى , لا أحد على الأطلاق !
   مر أكثر من خمسه أشهر و أنا جالسا على السرير , الشرائح و المسامير بكوعى الايسر و ركبتى اليمنى و الصفائح فوق و تحت الفقرتين المكسورتين بظهرى , بعد كل هذا الوقت تم فك الجبس من جميع أنحاء جسدى و إزاله بعض الشرائح و المسامير و بدأ العلاج الطبيعى مع الدكتوره (سلوى) !
   اليوم هو أول جلسه علاج طبيعى مع الدكتوره (سلوى) و أنا فى أنتظارها منذ الصباح , لقد مللت عدم الحراك لعده شهور و أريد أن أقوم من على الفراش بأى طريقه ممكنه , بداخلى طاقه قويه تجاه هذا العلاج , سأقوم بأى شئ لكى استطيع أن أسير مره أخرى !
   دخلت الممرضه الغرفه و تجر أمامها كرسى متحرك , عندما نظرت إليه شعرت بمدى عجزى , تلك أول مره اجلس عليه , أغمضت عينى فى محاوله لتقبل الامر , أعلم إن يوجد جهد كبير سوف أقوم به لكى استطيع أن أسير , على الاقل بعكازين , اااه , لا يوجد مفر , أقتربت الممرضه بالكرسى و ألصقته بالسرير و أتى من خلفها أثنان ممرضين رجال , قام الاول بحملى من الخلف و الثانى ساعده من الامام حتى تم وضعى على الكرسى و بدأت الممرضه تسير بى عبر ممرات و أروقه المستشفى , عند كل غرفه كنت أمر بجانبها كنت أنظر داخلها , هل يوجد أحدا حالته أسوء من حالتى ؟! .. الاجابه لا , لا أحد يعانى من فقدان الذاكره هنا !
   وصلت إلى الصاله الرياضه , غرفه مساحتها كبيره , كل حوائطها مكسوه بالمرايات كصالات الحديد و أنديه الجيم و اللياقه البدنيه , يوجد الكثير من الأجهزه الرياضه التى تساعد على تضخيم و نمو العضلات و لكن فى حالتى هذه الاجهزه سوف تعيد تأهيلى كى أصبح أنسان يستطيع أن يمارس حياته مره أخرى , حياته التى توقفت منذ أن فقد ذاكرته !
   يوجد العديد من الرجال و الشباب الذين يمارسون العلاج الطبيعى و كل واحد منهم يصاحبه ممرض أو دكتور يشرف على علاجه ...
_ عامل ايه دلوقتى ؟!
   قطع أكتشافى للمكان صوت سيده أتمت نصف القرن الاول من عمرها و تبدأ فى النصف الثانى , أدرت الكرسى الذى أجلس عليه و نظرت إليها , الانطباع الاول دائما يدوم , سيده فى العقد السادس من عمرها , التجاعيد تغزوا وجهها بأستيحاء , قوام ممشوق رغم الستون عاما التى مضتت من عمرها أو هكذا خُيل لى , شعرها مائل إلى اللون البنى و متدلى على كتفيها و بلطوا أبيض كُتب عليه , دكتور(سلوى عبدالحميد) , أستشارى العلاج الطبيعى .. فى يوم من الايام كانت هذه السيده جميله !
_ أنا دكتوره (سلوى عبدالحميد) و هتابع معاك العلاج الطبيعى .
_ أهلا يا دكتور .
_ انت جى فى حادثه عربيه , خلى بالك احنا عندنا شغل كتير و هنأخد وقت اكتر , الحمدلله انت فكيت الشرايح و المسامير و الصفحتين اللى فى ظهرك و الاشعه بتقول ان الحوض بدأ يلحم , انت أخدت حوالى خمس شهور فى الجبس و فى العلاج الطبيعى هنأخد حوالى من تلات لأربع شهور .. ايه ساكت ليه ؟!
_ أنا مش هقدر أستحمل كل الوقت ده , أنا تعبت من القعده فى المستشفى , جبس و خياطات و مسامير و شرايح و وجع ملوش أول من أخر , انا , انا بقالى هنا أكتر من سبع شهور محدش سأل عليه ولا انا عارف أفتكر حد من أهلى او صحابى أو أى حاجه , انا ابويا و امى ماتوا و مش قادر احزن عليهم عشان مش فاكر هما مين اصلا و شكلهم ايه !
_ انا حاسه باللى انت بتمر بي و ربنا يكون فى عونك و مدركه ان فقدان الذاكره ده حاجه صعبه على المريض و على اللى بيعالجه كمان , انا كل اللى اقدر اقدمه ليك ان اخليك ترجع تمشى على رجلك مره تانيه , انت عضمك لحم بسرعه و دى حاجه نادره الحدوث و اكيد هيبقى عندك اراده قويه عشان تبدأ العلاج الطبيعى , خدها نصيحه منى متفكرش فى اى حاجه دلوقتى غير فى العلاج الطبيعى و انك ترجع تمشى على رجلك تانى .
_ حاضر .
_ احنا مش هنعمل حاجه انهارده , انا كنت حابه اتعرف عليك و نتكلم مع بعض شويه , من بكره الصبح هنبدأ العلاج , استريح و نام كويس و متفكرش فى حاجه غير العلاج عشان بكره يوم طويل يا بطل .
   أبتسمت ردا على كلامها و أنا من داخلى أشعر بالضياع و الانهيار و فقدان الامل فى كل شئ , أتت الممرضه و أعادتنى إلى غرفتى مره أخرى لكى أبدأ رحله جديده .. رحله العلاج الطبيعى !

هناك تعليق واحد:

  1. المناصب خارج الجمهورية:-
    رئيـس قسـم العـلاج الطبيـعي – بمؤسسة حمد الطبية 1984 حتى 1992 – الدوحة – قطر.

    ­ مناصب وظيفته داخل الجمهورية:-
    رئيس قسم العلاج الطبيعى مستشفى مبرة المعادى من 1972 حتى 1979
    أخصائى علاج طبيعى – النادى الأهلى الرياضى من 1972 حتى 1979.
    أخصائى العلاج الطبيعى – مركز العجوزة العسكرى التأهلى من 1979 حتى 1982.

    ­ الخبرات الأكاديمية:-
    تدريس المقررات التالية على مستوى ( البكالوريوس والدبلوم والماجستير والدكتوراه):
    العلاج الطبيعى لأمراض الأطفال
    الوراثة لعلاج الطبيعى
    وسائل العلاج الطبيعي
    تأهيل الأطفال
    تحكيم الأبحاث العلمية المنشورة في المجلات العلمية بمجال العلاج الطبيعي.
    الإشـراف على رسائل الماجسـتير والدكتـوراه في العلاج الطبيعـــي.
    تقييم رسـائل الماجسـتير والدكتـوراه فـي العلاج الطبيعى.
    المشــاركة في مراجعـة وتحديث مناهج العـلاج الطبيعي بالكلية .
    إجراء أبحاث فى مجال تأهيل الأطفال.


    دكتور علاج طبيعي الشيخ زايد

    ردحذف